సందర్భం
అమెరికాలోని రోచెస్టర్ విశ్వవిద్యాలయ శాస్త్రవేత్తలు బోహెడ్ తిమింగలాల సుదీర్ఘ ఆయుష్షు వెనుక ఉన్న రహస్యాన్ని ఛేదించారు. ఈ జీవుల్లో ఉండే ఒక ప్రత్యేక ప్రోటీన్ సహాయంతో మానవ ఆయుష్షును పెంచే అవకాశం ఉందని వారు గుర్తించడంతో ఈ అంశం ప్రస్తుతం ప్రపంచవ్యాప్తంగా చర్చనీయాంశమైంది. శతాధిక ఆయుష్షు కోసం పరితపించే మానవాళికి ఈ పరిశోధన ఒక కొత్త ఆశను చిగురింపజేస్తోంది.
నిండు నూరేళ్లు హాయిగా జీవించాలని ప్రతి ఒక్కరూ కోరుకుంటారు. ఆరోగ్యకరమైన, సుదీర్ఘమైన ఆయుష్షు అనేది ప్రకృతి మానవుడికి ఇచ్చే అతిపెద్ద వరం. అయితే ఆధునిక జీవనశైలి, పెరుగుతున్న ఒత్తిడి, కాలుష్యం కారణంగా నేడు మానవుడి సగటు ఆయుష్షు కేవలం 73.8 ఏళ్లుగా మాత్రమే నమోదవుతోంది. దీనికి తోడు వయసు పెరిగే కొద్దీ క్యాన్సర్ వంటి ప్రాణాంతక వ్యాధులు ముంచుకొస్తున్నాయి. ఈ క్లిష్ట పరిస్థితుల్లో సముద్ర గర్భంలో నివసించే బోహెడ్ తిమింగలాలు ఎటువంటి వ్యాధులు లేకుండా 200 ఏళ్ల పాటు ఎలా జీవిస్తున్నాయో తెలుసుకోవడం శాస్త్రవేత్తల ప్రధాన లక్ష్యంగా మారింది. ఈ పరిశోధన ఫలితాలు వైద్య శాస్త్రంలో ఒక నూతన విప్లవానికి నాంది పలికేలా ఉన్నాయి.
అద్భుత జీవి బోహెడ్ తిమింగలం
- సముద్రపు లోతుల్లో నివసించే బోహెడ్ తిమింగలం క్షీరదాల జాతికి చెందిన అతిపెద్ద జీవుల్లో ఒకటి.
- ఈ తిమింగలాలు సాధారణంగా 200 ఏళ్ల వరకు ఎంతో ఆరోగ్యంగా జీవించగలవని శాస్త్రవేత్తలు గుర్తించారు.
- వీటికి వ్యాధుల నుండి అసాధారణమైన రక్షణ ఉండటమే ఈ సుదీర్ఘ ఆయుష్షుకు ప్రధాన కారణం.
- ఇతర జంతువులతో పోలిస్తే వీటి శరీరంలో ముసలితనం చాలా నెమ్మదిగా వస్తుందని పరిశోధనలు చెబుతున్నాయి.
ఆయుష్షును పెంచే సిర్ట్6 ప్రోటీన్
- బోహెడ్ తిమింగలాల సుదీర్ఘ జీవితం వెనుక ‘సిర్ట్6’ (SIRT6) అనే ప్రోటీన్ కీలక పాత్ర పోషిస్తోందని రోచెస్టర్ వర్సిటీ శాస్త్రవేత్తలు కనుగొన్నారు.
- శరీరంలోని డి.ఎన్.ఏ (DNA) దెబ్బతిన్నప్పుడు దానిని పునరుద్ధరించే పనిని ఈ ప్రోటీన్ సమర్థవంతంగా నిర్వహిస్తుంది.
- DNA పొగుల మరమ్మతులో లోపాలు తలెత్తితే వ్యాధులు వచ్చే ప్రమాదం ఉంటుంది, కానీ ఈ ప్రోటీన్ ఆ లోపాలను సరిదిద్దుతుంది.
- ఇతర క్షీరదాలతో పోల్చినప్పుడు బోహెడ్ తిమింగలాల్లో ఈ సిర్ట్6 ప్రోటీన్ ఏకంగా 100 రెట్లు ఎక్కువ ప్రభావవంతంగా ఉన్నట్లు గుర్తించారు.
పరిశోధనల్లో వెల్లడైన సత్ఫలితాలు
- శాస్త్రవేత్తలు బోహెడ్ తిమింగలం నుంచి సేకరించిన సిర్ట్6 జన్యువును మానవ కణాలకు, ఈగలకు జోడించి ప్రయోగాలు నిర్వహించారు.
- ఈ ప్రయోగం వల్ల దెబ్బతిన్న డి.ఎన్.ఏ మరమ్మతు ప్రక్రియ ఎంతో మెరుగుపడిందని వారు గమనించారు.
- ముఖ్యంగా ప్రయోగం చేసిన ఈగల జీవిత కాలం కూడా గణనీయంగా పెరగడం విశేషం.
- భవిష్యత్తులో మానవ శరీరంలో కూడా ఈ ప్రోటీన్ ఉత్పత్తిని పెంచేలా కణాలను ప్రేరేపిస్తే ఆయుష్షు పెరుగుతుందని భావిస్తున్నారు.
శీతల వాతావరణం మరియు ప్రోటీన్ ఉత్పత్తి
- బోహెడ్ తిమింగలాలు ఆర్కిటిక్ వంటి అత్యంత శీతల జలాల్లో నివసిస్తుంటాయి.
- అక్కడి చల్లటి వాతావరణం సహజసిద్ధంగానే ఈ ప్రత్యేక ప్రోటీన్ ఉత్పత్తికి ప్రేరణగా మారుతుందని పరిశోధకులు చెబుతున్నారు.
- ఈ ‘శీతల కిటుకు’ మానవుల్లో ఏ మేరకు పనిచేస్తుందనే దానిపై మరిన్ని లోతైన అధ్యయనాలు జరుగుతున్నాయి.
- మానవ శరీరంలో ఈ ప్రక్రియను కృత్రిమంగా ప్రేరేపించడం ద్వారా వృద్ధాప్య లక్షణాలను ఆలస్యం చేయవచ్చని ఆశిస్తున్నారు.
క్యాన్సర్ నిరోధక శక్తి
- సాధారణంగా మానవుల్లో 50 ఏళ్లు దాటిన తర్వాత కణాల విభజనలో లోపాల వల్ల క్యాన్సర్ ముప్పు పెరుగుతుంది.
- బోహెడ్ తిమింగలాలు మానవుల కంటే ఎన్నో రెట్లు పెద్దవి కావడంతో వాటిలో కోట్లాది కణాలు ఎక్కువగా ఉంటాయి.
- అధిక కణాలు ఉన్న జీవుల్లో సహజంగానే క్యాన్సర్ వచ్చే అవకాశం ఎక్కువ ఉండాలి, కానీ బోహెడ్ తిమింగలాల్లో ఈ వ్యాధి జాడ లేకపోవడం గమనార్హం.
- వీటి కణాల్లో ఉండే అంతర్గత నైపుణ్యం వల్ల డి.ఎన్.ఏ లోని మార్పులు క్యాన్సర్ కారకాలుగా మారకుండా అడ్డుకోబడుతున్నాయి.
వైద్య పరిశోధన రంగంలో రావలసిన మార్పులు ప్రస్తుత జన్యు పరిశోధనలు కేవలం వ్యాధులను నయం చేయడానికే పరిమితం కాకుండా, జీవన నాణ్యతను పెంచే దిశగా సాగాలని అంతర్జాతీయ వేదికలపై చర్చ జరుగుతోంది. కేవలం మందుల ద్వారా కాకుండా, జీవుల్లో సహజంగా ఉండే వ్యాధి నిరోధక శక్తులను మానవులకు అన్వయించే ‘బయో-మిమిక్్రీ’ పద్ధతులను ప్రోత్సహించాలి. జన్యు ఇంజనీరింగ్ రంగంలో నైతిక విలువలను పాటిస్తూనే, ఇలాంటి ప్రోటీన్లను మానవ కణాల్లో అభివృద్ధి చేసే సాంకేతికతపై మరిన్ని పెట్టుబడులు పెట్టాల్సిన అవసరం ఉంది. ప్రపంచ ఆరోగ్య సంస్థ వంటి సంస్థలు సుదీర్ఘ ఆయుష్షుకు సంబంధించిన పరిశోధనలను ప్రాధాన్యత అంశాలుగా గుర్తించి, వివిధ దేశాల శాస్త్రవేత్తల మధ్య సమన్వయాన్ని పెంచాలి. వృద్ధాప్యం అనేది ఒక అనివార్య ప్రక్రియ అయినప్పటికీ, దానిని ఆరోగ్యవంతంగా మార్చుకోవచ్చని ఈ తిమింగలాల పరిశోధన నిరూపిస్తోంది. సిర్ట్6 ప్రోటీన్ ద్వారా డి.ఎన్.ఏ ను పటిష్టం చేయడం అనేది భవిష్యత్తులో కేవలం ఆయుష్షునే కాకుండా, క్యాన్సర్ వంటి భయంకర వ్యాధుల నుండి కూడా మానవాళికి విముక్తి కలిగించవచ్చు. మానవుడి మేధస్సు ప్రకృతిలోని రహస్యాలను ఛేదిస్తూ పోతే, ఒకప్పుడు అసాధ్యం అనుకున్న ‘ద్విశతమానం భవతి’ అనే ఆశీర్వచనం నిజమయ్యే రోజులు దగ్గరలోనే ఉన్నాయి. శాస్త్ర సాంకేతిక రంగాల అభివృద్ధి ద్వారా మనిషి ఆరోగ్యవంతమైన సుదీర్ఘ జీవితాన్ని గడపడమే ప్రకృతికి మనం ఇచ్చే నిజమైన గౌరవం.